Pan pizza

工欲善其事，必先利其器。

為咗整到個靚靚嘅薄餅，所以專登去烘焙店買咗個薄餅盤。

自家製厚批，鍾意加乜嘢材料，加幾多都可以，而且新鮮熱辣出爐有得食～～yeah!!

材料：

鹽3克

糖15克

水120毫升

高筋麵粉175克

低筋麵粉25克

酵母3克

橄欖油10克

配料：

千島醬

粟米

火腿

菠蘿

做法：

用麵包機做麵糰。

取出麵糰後排氣，鬆弛20分鐘。

預熱焗爐220度。

排氣後，搓圓，擀平約3毫米厚。

塗上千島醬及其餘配料。

入爐220度焗18分鐘。

檸檬薏米水

天氣潮濕令到個人好容易攰，終於忍唔住要去揼骨鬆一鬆，順便做埋刮莎，唔刮由至可，一刮成個背脊花花碌碌。按摩師都忍唔住話我要飲薏米水，可以幫助去濕~~

好，薏米水啫唔難煲嘅，雪凍又好飲，好過飲其它嘢 ^^

材料：

生薏米30克

熟薏米30克

檸檬皮1個

水2500毫升

冰糖60克

後加材料：

檸檬隨意

做法：

1. 將生、熟薏米略洗，浸3小時。
2. 水滾後將薏米、檸檬皮，用大火滾一陣後轉文火煲大約40分鐘。
3. 加入冰糖試味，再煲多20分鐘。
4. 飲用時加入檸檬即可享用。

鮮蝦燒賣

笨手笨腳嘅我學人整燒賣，後果係手指尾起咗兩個水泡~~ T.T

整燒賣唔算難，不過就較為多步驟，豬肉切粒剁碎起膠、剝蝦挑腸……到逐隻逐隻包，全部都係細緻工夫，所以食嘅人請記住：我真係好愛你㗎！！如果唔係我點會咁有心機去整俾你哋食吖~~

材料：
新鮮蝦一份（魚檔一份份嗰啲）
瘦肉400克
肥肉25克
冬菰2隻（毋須太多否則會有酸味）
雞蛋1隻
燒賣皮半斤
冰水一湯匙

調味料：
鹽半茶匙
胡椒粉半茶匙
生粉1湯匙
糖2茶匙
雞粉1茶匙
生抽1湯匙
大地魚粉1湯匙
麻油1茶匙

裝飾：
紅蘿蔔少量

做法：
1）瘦肉切粒剁碎，肥肉切粒，鮮蝦剝殼挑腸用生粉、鹽清洗後切粒（調味料份量以外），以上材料切粒後放入雪櫃略雪。
2）瘦肉加入鹽、胡椒粉、生粉、冰水以順時針方向攪至起膠（可用攪拌機幫手，速度由慢至快。）
3）加入蝦肉拌勻（略拌便可否則會失去口感）。
4）加入冬菰、糖、雞粉、生抽、大地魚粉拌勻。
5）加入肥肉、麻油、雞蛋拌勻後放入雪櫃雪30分鐘。
6）將燒賣皮放在攤開的手指位上，加入適量的餡料，略合手指用來摺合燒賣皮，將燒賣轉到虎口位置，用匙羹將燒賣面壓實， 燒賣皮位置就用手壓實。
7）燒賣面放上紅蘿蔔蓉作裝飾，另切薄片放在燒賣底可防止黐底。
8）蒸籠舖上烘焙紙。
9）水滾後放入蒸籠，蒸15-18分鐘（視乎份量）。

蒜香雞翼

今日第一次用水波爐嘅預設程式，出嚟效果都唔錯，不過好似唔夠脆~~

呢味蒜香雞翼原全係零難度嘅菜式~~

材料：
雞翼8隻
蒜味炸雞粉

做法：

1. 洗淨雞翼抺乾。
2. 沾上蒜味炸雞粉。
3. 入爐(ER-GD400P 程式13)。

**怕雞翼唔夠味嘅話可以用少許雞汁預先醃一晚

紅荳砵仔糕

以前响上環住嘅時候，間中會光顧一對公公婆婆推着手推車擺買嘅砵仔糕，佢哋賣嘅砵仔糕好好食架，不過隨住佢哋年紀漸大，砵仔糕亦變得冇咁好食~~
今日試吓整，不過有啲材料唔夠用咗其他材料嚟代替，雖然都好好味，但感覺總係差少少咁~~

材料：
A: 紅荳40克、糖3茶匙、鹽少許
B: 粘米粉80克、澄麵26克、水120毫升
C: 片糖1片、水230毫升
雲呢拿油兩滴

做法：
1）紅荳預早一晚浸好。
2）材料(A)用水煮30分鐘，熄火焗15分鐘（如喜愛腍可焗耐一些）。
3）材料(B)拌勻至沒有粉粒。
4）材料(C)加熱煮溶後加入已拌勻的材料(B)及雲呢拿油。
5）放入蒸架模連一起蒸至水滾。
6）水滾後，倒入粉漿及紅荳，蓋上鍚紙防止倒汗水滴落糕內，大火蒸17至18分鐘。
7）待涼後脫模。

火腿香蔥卷

此乃實驗品，哈哈~~ 整呢個包嘅原因係屋企好多蔥，諗嚟諗去都唔知點用好，所以專登走去買火腿返嚟整呢個火腿香蔥卷。

點解叫實驗品呢？係因為我冇跟任何食譜，只係根據經驗去估計材料，嘻嘻~~好彩出嚟都唔算太差，不過技巧上仍要改進。

材料：

水150ml

蛋液30g

糖30g

鹽3g

高筋麵粉250g

低筋麵粉50g

酵母3g

無鹽牛油15g

配料：

蔥、火腿適量

做法：

1. 火腿切粒，備用。
2. 蔥花用廚房紙印乾水份，備用。
3. 所有材料(無鹽牛油後落)放入麵包機製作麵糰。
4. 將麵糰擀薄。
5. 均勻放上火腿粒及蔥花。
6. 由下向上捲起，黏合麵糰收口。
7. 切成均等大小的份量，放入焗爐發酵30分鐘。
8. 掃上蛋液，以180度焗15分鐘。

南乳燒雞

近期見到好多網友整呢款南乳燒雞，由材料至做法都非常容易，所以早兩日逛街市時見到有冰鮮雞，諗都唔駛諗買返屋企整，順便試吓個焗爐焗雞得唔得！今次用Hybird石窯模式，隻雞燒到外脆內軟，而雞肉仲超多汁呀~~ ^^

材料：

冰鮮雞一隻

南乳兩磚

砂糖兩湯匙

做法：

1. 洗淨冰鮮雞後抹乾水份。
2. 將南乳及砂糖拌勻後，均勻塗在雞內外。
3. 幫雞按摩一下，令雞肉食嘅時候更有彈性。
4. 放入雪櫃醃大約三小時或過夜。
5. 由雪櫃取出醃好嘅雞風乾至少半小時，令雞外皮變得脆口。
6. 托盤用錫紙鋪面方便接住燒雞時的油(如果唔係會洗到傻)，放上烤架，把雞放在烤架上，用Hybird石窯模式，220度焗50分鐘。

小提示：

焗時要留意外皮會否燒燶，如有需要可在適當時候加上錫紙。

韓式餐肉泡菜炒飯

一向喜歡吃炒飯，因為香口而且甚麼也可以用來作炒飯材料，就算只用雞蛋也非常美味 ^_^

一向亦喜歡吃泡菜，喜歡它辣辣的非常醒胃，在韓國吃烤肉就一定要店子添食。一直都以為泡菜屬於前菜應該是凍食的，但原來熱食更加美味，事原有一次在韓國烤肉店，見到個姐姐將泡菜放在燒烤盤上，當時我覺得很奇怪，我又有樣學樣試試，奇怪的事情就這樣發生了，好好味呀~~ XD 熱熱的泡菜比起凍冰冰的泡菜味道更濃郁，更合我口味呀！

今日打開雪櫃，發覺雪櫃有前一日餘下的韓國午餐肉以及小量泡菜，就二話不說炒個泡菜炒飯 ^^

椒鹽雞軟骨

雞軟骨~~好鍾意食，不過外出食唔太化算，少少嘅份量已經要四十大洋，所以今日自己動手整，一包都只係二十大洋仲要夠晒份量呀 :-)

材料：
雞軟骨一包
鹽適量
胡椒適量

做法：
1）將雞軟骨溶雪後洗淨，用廚房紙抹乾水份。
2）以250度預熱焗爐。
3）放入焗爐焗8-10分鐘，假若唔夠脆可再焗多3-5分鐘。
4）出爐後，灑上鹽及胡椒。

北海道牛乳燉蛋

天氣回暖再幾日又再次轉凍，真係要小心身體，好好保暖~~

襯住凍凍哋，今日整咗個北海道牛乳燉蛋嚟暖一暖身 ^^

北海道牛乳燉蛋(四人份)

材料：

雞蛋4隻

牛奶500毫升

砂糖60克

做法：

1. 將雞蛋發打好備用。
2. 將牛奶加熱(微熱便可，以免煮熟雞蛋)。
3. 將牛奶加入雞蛋內，再加入砂糖拌勻。
4. 用篩隔入碗內，用匙羹撥去泡沫。
5. 蓋上錫紙以防倒汗水。
6. 隔水蒸11-12分鐘，每4分鐘揭開蓋讓蒸氣散去。

日式芝士蛋糕

今日係元宵節加情人節，雖然都仲係凍凍哋，不過下晝都出過吓太陽，算做有啲溫暖啦~~

應試係食湯圓嘅日子，但係我去到超級市場竟然完全唔記咗要買，所以就做咗個日式芝士蛋糕嚟頂檔  :P

用咗個7吋蛋糕模，所以個蛋糕好扁 (>.<)

材料：
蛋白霜：蛋白3隻、糖霜50G
奶酪糊：忌廉芝士100G、牛奶50G、無鹽牛油溶液30G
低筋麵粉20G、粟粉10G、雲呢拿油數滴

做法：

1. 將忌廉芝士、牛奶放入碗中，隔水加熱溶至奶酪糊。
2. 加入牛油溶液到奶酪糊，完全拌勻，放涼待用。
3. 打蛋白霜：蛋白加入糖霜(分2-3次)
4. 加入篩過嘅低筋麵粉、粟粉至奶酪糊並完全拌勻。
5. 分三次加蛋黃(逐隻加入拌勻再加)至奶酪糊。
6. 加入雲呢拿油拌勻。
7. 分三次加入蛋白霜。
8. 用錫紙封住蛋糕模底層，最好封兩層，以防入水。
9. 倒入蛋糕漿至蛋糕模。
10. 加熱光波爐，150度10分鐘。
11. 使用水浴法，用一個略比蛋糕模大嘅錫紙盤加入大約1.5CM高嘅凍水(必要時可加入冰塊)，再放入蛋糕模。
12. 用150度焗60分鐘。
13. 蓋上錫紙以防蛋糕面過燶，再用150度焗15分鐘。大功告成！

北海道牛乳抹茶包

一盒北海道牛乳可以用嚟做咗幾款唔同嘅嘢食，之前已經整咗牛奶包、布甸同埋cup cake，仲可以整埋呢個北海道牛乳抹茶包。嘻嘻…