芝士波波 Cheese Ball

黐咗線~~ 呢幾日整親嘅包都係同芝士有關，哈哈~~

聽日係大魔怪學校嘅運動會，原本我應承陪佢去嘅，但咁啱小魔怪上星期開始由星期三上堂改為星期四上堂，因為太遠嘅關係我實在唔放心交俾工人姐姐帶佢去上堂，而且小魔怪尋晚做咗叭地熊，同個地板 KISS KISS，撞到成隻雞蛋黐咗响個額頭咁樣 (心痛死我喇！)，所以逼於無奈唯有工人姐姐帶大魔怪去運動會。為咗補償我呢個缺失，所以今日專登整咗呢個芝士波波俾大魔怪聽日帶去運動會 :P

材料：

糯米粉100克、木薯粉40克、芝士碎55克、糖10克、鹽1克、牛油溶液大約45毫升、

牛奶65克

份量：

約15個

做法：

1. 預熱焗爐。
2. 先將糯米粉、木薯粉篩一次。
3. 加入芝士碎、糖、鹽、牛油溶液後拌勻。
4. 逐少逐少加入牛奶後搓勻 (要視乎粉糰會否過濕，才決定要加多少牛奶。)
5. 將粉糰整成小波波形狀。
6. 焗大約十五分鐘。

芝士小餐包 Cheese Bun

香噴噴嘅芝士餐包

側面都好靚仔 ^O^

包包入面好軟綿綿

今次嘅芝士小餐包係用咗甜餐包嘅食譜加以改良嘅，哈哈~~ 因為屋企有好多芝士碎，唔想浪費，所以就手多多咁响甜餐包嘅面加咗啲芝士碎，令到佢變成又香又脆嘅芝士小餐包喇~~

材料：

砂糖18克、鹽2克、高筋麵粉150克、即用酵母2克、全蛋15克、水75克、無鹽牛油14克

裝飾材料：

掃面蛋液適量、芝士碎適量

其它材料：

固體菜油適量

工具：

6吋或7吋方形模1個

份量：

1份(9小個)

做法：

1. 順次序將砂糖、鹽、高筋麵粉、即用酵母、全蛋加水放入麵包機內做麵糰。
2. 將麵包機操作模式設定為搓麵糰。
3. 待麵糰成形 (大約七至十分鐘) 加入無鹽牛油。
4. 麵糰首次發酵好(大約一個半小時)，由麵包機取出麵糰放在工作枱上。
5. 雙手撲上麵粉，按壓麵糰將空氣排走。
6. 將麵糰分割成九等份並滾圓，蓋上保鮮紙讓麵糰鬆弛約十五分鐘。
7. 將麵糰壓平並再次滾圓，放入已掃固體菜油的方形模內，蓋上保鮮紙作最後發酵(大約四十五分鐘至一個小時，要視乎氣溫。)。
8. 待麵糰發酵至大約兩倍大時，輕手掃上蛋液及加上芝士碎。
9. 放入已預熱的焗爐，大約焗十五分鐘。

沙律芝士包 Salad Cheese Bun

有一排冇寫新文章喇，呢排唔知點解好容易就攰，夜晚又瞓得唔好，呀~~~

呢段時間都有保持住整麵包，不過都係用麵包機整嘅方包類，所以都懶惰到唔寫新文章~~嘻嘻~~

終於的起心肝整番啲手作麵包，今次整咗甜甜地嘅沙律芝士包，一如所料，大、小魔怪一日就同我 KO 晒 @.@

材料：
高筋麵粉130克、即用酵母2克、全蛋15克、無鹽牛油12克、水65克、砂糖15克、鹽1克
沙律醬適量、芝士碎適量

在銀礦灣沙灘享受家庭樂

一家大細的小鞋子

有好耐冇去過沙灘喇，對上嗰次去嘅時候小魔怪都仲响我個肚入面，依家轉吓眼小魔怪都已經有兩歲，時間過得真係好快。想唔認老都唔得~~ 因為今日同大、小魔怪玩完大半日我差唔多散晒 >_<

今朝趁小魔怪一起身就即刻叫埋大魔怪起身預備出發，响東涌坐巴士前往梅窩，去到梅窩碼頭，幫大魔怪買咗對拖鞋同埋吹泡泡，就即刻去食早餐。因為早到嘅關係，周圍都冇乜人，感覺好舒服。

食完早餐就立即動身前往沙灘，初初小魔怪仲係呆吓呆吓，淨係識坐响沙灘睇住大魔怪玩沙，過咗一陣先識得玩。今朝天公造美，冇乜太陽兼且好好風，大、小魔怪跟爸爸玩，我就攤咗响樹蔭下休息，嘻嘻~~ 

我哋玩到大約一點就打道回府，因為小魔怪要午睡，大魔怪夜晚仲要上跆拳道，所以唔想佢玩得太攰，而且第二日仲要返學。不過原來我嘅想法太天真，返到屋企同兩隻魔怪沖完涼就俾佢哋去瞓覺豬，我已經攰到冇朋友，點知佢哋瞓咗大約一個鐘就彈晒起身，仲要精力充沛咁响度玩 >O< 果然地球上最恐怖嘅動係 "小朋友" 呀~~

樹蔭下的美景

沙灘上兩個好型嘅湊仔爸爸

綠茶提子吐司 Green Tea Raisin Loaf

平日做方包類嘅麵包多數乾手淨腳用麵包機直接整就算，今日就手多多用咗個焗爐嚟整，效果都唔錯，但係因為我家焗爐只係一個少少嘅多士焗爐，冇得調教溫度，所以每次用佢嚟焗麵包，總要擔定櫈仔坐响個焗面前睇住嚟焗 @.@

今次呢個綠茶提子吐司係用湯種嚟整，真係好軟綿綿 ^_^，唔知大、小魔怪會唔會鍾意呢？

材料：

高筋麵粉237克、奶粉1T、綠茶粉3克、砂糖30克、鹽3克、快速乾酵母5克

湯種78克、牛奶100克

無鹽牛油25克

提子乾50克

大魔怪學校家長日

自問性格內向，很怕出席家長會、陸運會...等等呢要 social 嘅活動。因為同其他家長唔熟絡而且話題唔啱，所以可以避得就避免＞＜今日係大魔怪二年級第一次嘅家長會，幾唔願意都要出席，點都要見吓今年嘅老師，同埋知道吓大魔怪跟唔跟到學校嘅進度先得。

同兩位班主任傾過，佢哋分別教大魔怪中文同英文，知道大魔怪上堂都留心同成績算好，中文老師仲讚大魔怪啲字寫得唔錯。就連我最擔心嘅普通話，老師都話普通話唔係大魔怪嘅母語嚟講佢算講得好好，但係就話大魔怪會九唔搭八上上吓堂嘅時候去同老師講自己屋企嘅嘢〜〜哈哈

今日家長會時間唔多，只可以英文老師和數學老師講到幾句，英文老師話大魔怪英文好好，比起同班小朋友好，可以整句句子啱晒文法咁樣講到。數學老師都話佢能力超越晒依家教緊嘅嘢，學校教緊個位乘數，但大魔怪已經識計兩位乘數。

聽到啲老師咁樣讚佢，我都好開心，為咗兩隻大、小魔怪辭咗份都覺得值得。不過今日老師話大魔怪間唔中响學校有胃痛，但大魔怪就從來都冇同題過，擔心呀〜〜

Happy Birthday to Little Monster!!

Happy Birthday to Little Monster!! 

小魔怪今日兩歲生日喇，希望佢身體健康、開心快樂每一天！仲有就係希望佢快啲學會用語言嚟表達自己嘅需要，佢實在太遲都未肯講嘢，都唔明點解已經有隻大魔怪陪住佢成長都會咁遲都唔肯講嘢嘅........ 回想大魔怪好早就已經識講嘢，把嘴仔仲好醒吓，點解小魔怪你一啲都學唔到架？

响Häagen-Dazs^®買咗個雪糕蛋糕同小魔怪慶祝，叫做相聚一刻(芒果味)，因為我唔鍾意食朱古力同埋士多啤梨，所以可以選擇嘅蛋糕確實唔係好多 \(^O^)/ 個蛋糕味道唔錯，蛋糕表面嘅芒果醬就太搶太甜，反而令到啲芒果雪糕感覺幾清。整體而言，係合格嘅！.....哈哈....

黑糖方包 Brown Sugar Toast

今朝帶小魔怪上完 PLAYGROUP 後，成隻左手好似俾人廢咗咁，小魔怪呢排好懶成日唔肯自己行扭人抱，佢仲要通常專攔我嚟蝦，可憐嘅我抱住廿幾磅嘅小魔怪由離島去到西營盤來回上堂，隻手想唔廢都難 :(。

今日實在太攰喇，完全冇力氣搞咁多嘢，所以只係簡簡單單咁整咗黑糖方包。黑糖嘅氣味好香(焗嘅時候已經聞到)，初初食落口嘅時候覺得唔係好夠甜咁，但嗒吓嗒吓就覺得夠味，啲黑糖嘅味道係回番轉頭架~~ 好得意。

今次都係做懶人，用晒麵包機代勞，出嚟除咗外觀麻麻哋之外，其餘嘅味道同埋質感都好好 ^__^。

材料：
高筋麵粉280G、乾酵母4G、水170G、黑糖50G、鹽4G、無鹽牛油20G

菠蘿大菜糕

今日唔駛整麵包，咁啱醒起雪櫃有三片菠蘿用剩咗，所以就即慶整咗呢個菠蘿大菜糕 (HELLO KITTY 首級版) ~~ 嘻嘻

材料：大菜絲10G、冰糖110G、水1000ML、罐頭菠蘿3片

法式小餐包 French minute bun

因為懶惰，所以今次嘅麵糰用咗麵包機嚟整，真係慳番唔少時間同汗水 （唔係講笑，每次搓麵糰都搓到大汗疊細汗〜〜）

雖然啲包包嘅樣唔算靚仔，但真係做到外脆內軟，仲好好味，試食嘅時候真係食到唔想定呀！呢款法式小餐包不論就咁食，塗牛油或者果醬都一樣好味道架 ^_^

材料：

高筋麵粉130克、低筋麵粉50克、乾酵母2.5克、鹽2克、水100克（用麵包機搓麵糰用室溫水就可以，否則要用溫水。）

追完日劇再追韓劇

近呢兩個星期不停咁追劇，首先追日劇「半澤直樹」，再追韓劇「主君的太陽」，要抖一抖先得。一追劇就乜都唔多想做，所以呢兩個星期除咗煮飯、整麵包就只有追劇 \(@.@)/

但係又有新嘅日劇「律政狂人（第二季）」响10月9日開播喇〜〜真係抖一抖又嚟追過呀 XD

好期待今次 Legal high season 2 堺雅人嘅精彩演出，佢响上一季嘅表演簡直係出神入化、超搞笑呀！所以依家逢星期六晚 J2 播，我都忍唔住要番睇，順便重溫吓啲記憶去睇新一季，嘻嘻~~

尋日因為個電子磅冇電，搞到我唔可以早啲整麵包，因為夜嘛嘛先買到電池，所以好夜先有得整〜〜亦因為夜，所以只好簡簡單單用麵包機嚟整咗軟綿綿嘅方包俾兩隻魔怪就算！嘻嘻，頭先睇過仲有得剩，今晚可以偷懶一晚聽日先整。啦〜啦〜