可以鬆一口氣

Yeah!! Yeah!! Yeah!!

終於搵到一間幼稚園肯收小魔怪讀全日幼兒班喇，好開心呀！真係可以鬆一口氣~~ =D
之前面試過嘅一間唔收，就連上午班都話要等後備，搞到我個心囉囉攣，都唔知繼續等個後補位定係唔等好。尋日決定唔坐以待斃，再去試吓搵另一邊嘅幼稚園，竟然俾我發現原來仲有位喎~~

首先我去咗一間佛教主辦嘅幼稚園，一入去我响個心到「嘩！」咗一聲，因為個校舍好靚，一入門口嘅左手邊係一排嘅 MAC 機同埋一行行嘅 MINI IPAD，真係嚇咗我一跳，而且啲老師好有禮貌，唔似得小魔怪之前面試嗰間啲老師好似好唔憂收生咁，一副你嚟唔嚟讀都冇所謂咁嘅樣 ><。可惜嘅係呢間佛教主辦嘅幼稚園暫時只有下午班嘅位，全日班已經滿咗，而且仲有成廿幾人排緊後備，上午班小魔怪就可以排後備第三個。原本老師安排响星期五下午兩點半面試，跟住佢再問我小魔怪大約會幾時瞓完午覺？四點三瞓完未？我好唔好意思咁同佢講：小魔怪通常由一點瞓到四點幾五點先起身。佢即刻話：唔，如果小朋友瞓唔醒會比較忟憎，不如星期六上晝先面試，好唔好？我當然係即刻話好啦~~ 老師好體貼呀！

跟住我去咗一間基督教主辦嘅幼稚園，一入去我都覺得校舍唔錯，雖然冇佛教嗰間咁靚~~ 不過接待我嗰位老師就有啲笨笨哋，我一開始已經表明係想幫小朋友報名，佢話學校已經過咗面試日，你可以拎一張章程返去，有興趣嘅話可以打電話嚟約時間面試同埋拎報名表。(=.=') 我忍唔住問佢：我可唔可以依家拎報名表呀？佢話：可以。你返去填完再打嚟約時間面試吖。(=.=") 我又忍唔住問佢：依家唔可以約埋時間面試？佢話：可以。我實在係忍唔住响心裏面講@#$@#$@% 咪玩啦，唔好嘥我時間好唔好。跟手我同老師約埋星期五上晝時間嚟面試，佢竟然同我講：你到時帶埋五佰蚊嚟交留位費。我好懷疑咁問佢：即刻已經知收唔收？佢話：係呀。我低頭微微反眼，並响個心度同自己講：你不如叫我依家話收小魔怪，兼且交埋留位費啦！我對呢間學校印象麻麻~~

跟住我又去咗另一間非牟利機構嘅幼稚園碰碰運氣，啲職員好有禮貌，竟然話俾我知全日班仲有位，我即刻笑晒呀~~ 當然我都有懷疑，點解佛教嗰間咁多人要排後備，而呢間就仲有位剩，會唔會呢間幼稚園有啲問題，所以冇乜人讀呢。老師即時幫我約時間面試，原本約响今日下晝，我好老實咁同師講：小魔怪今早要上 Playgroup，下晝會好攰，我怕佢表現會唔好，唔知可唔可以約响上晝九點見呀？老師好好人咁話：冇問題。嘻嘻~~ 老師好好人呀！呢間幼稚園雖然都係冇佛教嗰間咁靚咁新淨，當然我都見唔到一排排嘅 IPAD啦，但都好好，整體感覺好舒服、好乾淨，而且最最最重要嘅係有全日班呀！

尋日返到屋企之後，左諗右諗，雖然遠啲啲，但係啲老師、校舍真係好過之前見嗰啲嘅幼稚園，我應該點好呢？等近啲嘅？定係攔呢度各方面都好啲嘅呢？ 如果真係攔呢度嘅幼稚園，我又應該攔邊間好呢？

自尋煩惱完一晚之後，今早帶咗小魔怪去非牟利嗰間面試，因為今朝面試完之後要趕住去上 Playgroup 所以我專登早啲上去睇吓可唔可以早啲見完早啲走。一去到學校，見到尋日好有禮貌嘅職員姐姐，佢即刻示意俾校長知道我哋嚟面試，校長即刻就叫咗主任嚟同小魔怪面試。呵呵~~ 感覺好被尊重呀！

主任好有耐性問小魔怪叫乜嘢名、今朝有冇飲奶.....等等，但係小魔怪完全當佢透明，只係眼都唔眨咁望住佢身後嘅唱機掛住聽歌 :P，我同主任講：小魔怪嘅語言能力比較差，佢只係唔肯講，聽係完全明白嘅。主任都睇番原來小魔怪响十月出世都屬於係比較細嘅仔，所以都覺得問題唔大。呼~~好彩主任明白事埋！跟住主任俾咗啲拼砌玩具俾小魔怪玩，小魔怪好彩都玩到，其後主任同我傾計嘅時候佢自己不停咁玩啲拼砌玩具，完全冇難度咁呀！叻！叻！同主任傾咗一啲小魔怪响屋企嘅嘢之後，主任就話可以出去交留位費喇！YEAH!! YEAH!! YEAH!!

就我所見呢度校長、主任同埋老師都好親切，校舍都幾靚，而且仲有全日班，簡直完全乎合我嘅理想呀！希望小魔怪响呢度會有一個愉快嘅幼稚園生活啦！